Deputeti i Lidhjes Demokratike të Kosovës, Avdullah Hoti e ka quajtur ‘propagandë e marrë’ krahasimin që kryeministri Albin Kurti bëri në mbledhjen e Qeverisë lidhur me produktet e brendshme bruto të vitit 2023 me ato të vitit 2000.

Ish-kryeministri i vendit me ironi i ka propozuar kreut të qeverisë që të bëjë krahasimin me vitin ’99 pasi që sipas tij, rritja del 10 herë më e madhe, përcjell Arbresh.info.

Postimi i plotë:

Sot, në hapje të mbledhjes së Qeverisë, kreu i Qeverisë lëvdohej duke e krahasuar Produktin e Brendshëm Bruto të vitit 2023 me atë të vitit 2000.

Të gjithë e dinë se në vitin 2000, ne sapo ishim kthyer nga deportimi i “politikës së tokës së djegur”, që u zbatua sistematikisht nga regjimi serb.

Në vitin 2000, gjysma e shtëpive ishin të djegura. Kafshët shtëpiake dhe mjetet bujqësore ishin të vjedhura e të shkatërruara. Infrastruktura shkollore, shëndetësore e rrugore ishte shkatërruar gati plotësisht nga lufta e nga mungesa e investimeve mbi 10 vjet. Shumica e bizneseve ishin plaçkitur e duhet të nisnin nga e para.

Kjo sjellje e kreut të Qeverisë është propagandë e marrë, sikur ajo e komunistëve, të cilët mashtronin qytetarët me ‘arritjet e planeve 5-vjeçare’, në ndërkohë që qytetarët varfëroheshin.

Unë i propozoj atij ta bëj krahasimin me vitin 1998-99. Sigurisht se rritja i del të jetë jo 5 herë, por 10 herë më e madhe!/Arbresh.info