Policia e Kosovës ka realizuar një plan taktik lidhur me rastin e koduar ,,Rrethi’’  ku rreth orës 14:30 në rrugën e ,,Pejës’’ në Fushë Kosovë ka ndaluar dhe arrestuar në flagrancë dy persona të dyshuar.

Sipas policisë, të dyshuarit E.XH dhe A.I janë ndaluar, por gjatë ndalimit është vërejtur se i dyshuari i dytë me qëllim të fshehjes së dëshmive ka gëlltitur një qese të vogël me lëndë narkotike të llojit kokainë, të cilën paraprakisht e kishte blerë nga i dyshuari i parë, shkruan Arbresh.info.

Policia bën të ditur se me qëllim të sigurimit të provave të nevojshme, në konsultim me prokurorinë e krimeve të rënda Prishtinë, është kryer kontrolli i banesës së të dyshuarit E.XH., ku me këtë rast në cilësinë e provave materiale janë gjetur dhe konfiskuar :

• Substancë e dyshuar narkotike kokainë e ndarë në 17 qese (16 te vogla të gatshme për shitje dhe 1 me sasi më të madhe) me peshë të përgjithshme prej 99.4  gramë,
• Një pako në të cilën kishte një lloj përzierësi që përdoret për shtimin e sasisë së kokainës me peshë prej 63 gramë ,
• Një peshore digjitale që përdoret për matje precize në sasi të vogla dhe disa qese të zbrazura,
• Para të gatshme  në vlerë 1750 Euro,
• 3 Armë automatike AK-47
• 6 karikatorë
• Municion të llojeve të ndryshme në sasi prej 510 copë.
• 2 bajoneta dhe 8 pjesë të ndryshme për armë.
• Një palë dylbi dhe 2 këllëfë armësh .
• Një telefon celular

“Vlera e përafërt e narkotikëve të konfiskuar sipas çmimit të tregut llogaritet rreth 6000 Euro.”, thuhet në njoftim.

“Të dyshuarit janë shoqëruar për intervistim dhe në konsultim me prokurorin kujdestar i dyshuari E.XH. dërgohet në mbajtje për rastet nga neni 267 dhe 366 i KPRK-së , kurse i dyshuari A.I dërgohet në mbajtje për disa urdhër arreste të mëhershme të cilat i kishte aktive.”, thuhet tutje./Arbresh.info/