Arbnor Muja, e ka thyer heshtjen dhe ka folur për largimin e papritur nga Antwerpi , duke nënshkruar me klubin turk Samsunsporit në elitën e futbollit të Turqisë, gjatë afatit kalimtar të janarit.

Sulmuesi i krahut u transferua te Samsunspori për 2 milionë euro.

Shqiptari nga Kosova ka luajtur në gjysmëfinalen e Kupës së Belgjikës kundër KV Oostende më 8 shkurt, por u zëvendësua pas 64 minutave.

Askush nuk mendoi se ajo do të ishte ndeshja e tij e fundit për Antwerpen, pasi klubi pas një dite njoftoi transferimin e tij te klubi turk Samsunspor.

“Ky transferim erdhi si befasi për mua. Nuk e kisha ndërmend të largohesha. Antwerpi ishte bërë shtëpia ime e dytë. Për fat të keq, klubi më tha në fund të muajit janar se dashuria më nuk ishte e ndërsjellë”.

“Nuk e kam kuptuar plotësisht vendimin e klubit. Por kështu funksionon futbolli. Situata mund të ndryshojë nga dita në ditë. Duhet ta pranosh. Më mungon klubi, tifozët dhe qyteti”, ka thënë Muja për mediumin belg “hbvl.be”.

Muja nuk e ka gjetur edhe aq mirë vetën te Samsunspor, pasi nuk është startues i rregullt dhe kjo do të mund t’i kushtojë me humbjen e vendit te Shqipëria për Euro 2024.