Ambasada e Kosovës në Maqedoninë e Veriut në bashkëpunim me Institutin për Trashëgimi Kulturore dhe Shpirtërore të Shqiptarëve (ITKSHK) ka shënuar 25 vjetorin e intervenimit të NATO-s në Kosovë.

Zëvendësministrja e Punëve të Jashtme dhe Diasporës, Liza Gashi mori pjesë në këtë jubile duke ritheksuar se sulmet ajrore të NATO-s ishin veprime të drejta historike dhe ndërhyrje të nevojshme për të ndaluar gjenocidin e Serbisë ndaj popullsisë shqiptare në Kosovë, shkruan Arbresh.info.

“Reflektimet të cilat i bëjmë sot mbi Republikën e Kosovës, si një shtet që promovon lirinë dhe demokracinë, bazuar në parimet e të drejtave të njeriut dhe të pakicave, si dhe në vlerat perëndimore, janë argumenti më i fortë për të vlerësuar sulmet ajrore të NATO-s, si një veprim të drejtë dhe historik”, tha zëvendësministrja Gashi përpara të pranishmëve.

Njëherit u vlerësua lartë roli i autoriteteve të Maqedonisë së Veriut e sidomos komunitetit shqiptar në këtë vend fqinjë në strehimin e refugjatëve nga Kosova.

Në diskutimin e organizuar nga Ambasada jonë në Maqedoni kontribuuan edhe Ambasadori i Kosovës në Maqedoninë e Veriut z. Florian Qehaja, Drejtori i ITKSHK-s z. Skender Asani dhe gazetarja znj. Dijana Toska, duke shënuar këtë ngjarje historike jo vetëm për Kosovën por gjithë rajonin, si dhe reflektimin mbi pikënisjen e kultivimit të vlerave evropiane në 25 vitet e fundit.

Po ashtu në këtë ngjarje, morën pjesë diplomatë e përfaqësues të institucioneve vendore dhe ndërkombëtare, akademikë e përfaqësues nga sektorë të ndryshëm./Arbresh.info/