Deputeti i Lidhjes Demokratike të Kosovës (LDK), Avdullah Hoti ka njoftuar se nesër në orën 12:00, në Komisionin Parlamentar për Buxhet raporton Guvernatori i BQK-së për pjesëmarrjen e tij në dialogun në Bruksel për rregulloren për përdorimin e valutave të huaja në Kosovë.

Sipas tij, Qeveria e ka detyruar BQK-në atë të përfshihet në dialog, shkruan Arbresh.info.

“Me kërkesë të opozitës, nesër në orën 12:00, në Komisionin Parlamentar për Buxhet raporton Guvernatori i BQK-së lidhur pjesëmarrjen e tij të pakuptimtë dhe pa asnjë autorizim ligjor në dialog në Bruksel për rregulloren për përdorimin e valutave të huaja në Kosovë.
Edhe pse BQK-ja është institucion i pavarur kushtetues, Qeveria e detyroi atë të përfshihet në dialog në mënyrë joligjore.”, ka shkruar Hoti.

Deputeti Hoti u shpreh se është shqetësues që Qeveria dhe BQK nuk pranuan kërkesëne  SHBA-së për shtyrje të zbatimit të rregullores.

“Shqetësues mbetet fakti se Qeveria dhe BQK-ja nuk pranuan kërkesat e aleatit kryesor të Kosovës për shtyrje të zbatimit të rregullores. Por pranuan të ulen në tavolinë me palën serbe me kërkesë të ndërmjetësit.”, ka shkruar Hoti./Arbresh.info/