Në Francë, ligji i ri i diskutueshëm për emigracionin, të cilin qeveria e kaloi në parlament me votat e ekstremit të djathtë, u botua sot në Gazetën Zyrtare.  Sipas ligjit, të huajt që kërkojnë leje qëndrimi në Francë duhet të “respektojnë vlerat e republikës”.

Gjithashtu, sipas ligjit të ri, lejet e qëndrimit të të huajve që përbëjnë rrezik për rendin publik mund të shfuqizohen ose të mos rinovohen dhe këta persona mund të dëbohen më lehtë.

Një tjetër detyrim i ri për të huajt është që nëse kërkojnë leje qëndrimi për më shumë se një vit, do të duhet të flasin frëngjisht në nivelin A2. Ligji shkaktoi disa javë protestash mbarëkombëtare, në të cilat thuhej se ai mund të nxisë diskriminim dhe racizëm kundër shtetasve të huaj dhe të dyfishtë.

Të enjten, Këshilli Kushtetues miratoi pjesërisht ligjin e emigracionit, duke vendosur të heqë më shumë se 30 nga 86 nenet e tij.

Këshilli vendosi të hiqte nenet që i bënin kushtet për bashkimin familjar më të rrepta dhe lidhnin aksesin në përfitimet sociale, si ndihma e qirasë për të huajt, me kohëzgjatjen e qëndrimit të tyre në Francë.