Një gjykatë në Moskë e ka zgjatur deri në fund të marsit paraburgimin për gazetarin e Wall Street Journal, Evan Gershkovich, i arrestuar për spiunazh, që do të thotë se gazetari do të kalojë të paktën një vit pas hekurave në Rusi.

Konsulli i Përgjithshëm i Shteteve të Bashkuara Stuart Wilson mori pjesë në seancën dëgjimore në Gjykatën e Qarkut Lefortovo, e cila u zhvillua me dyer të mbyllura, sepse autoritetet thonë se detajet e çështjes penale kundër gazetarit amerikan janë të klasifikuara, shkruan Euronews, transmeton Arbresh.info.

Në një video të shpërndarë nga agjencia shtetërore e lajmeve Ria Novosti, Gershkovich u shfaq duke dëgjuar vendimin, duke qëndruar në një kafaz gjykate i veshur me kapuç dhe xhinse blu të lehta. Ai u fotografua pak kohë më vonë duke ecur drejt një furgoni burgu për t’u larguar nga gjykata.

Gershkovich, 32 vjeç, u arrestua në mars ndërsa ishte në një udhëtim për të raportuar në qytetin rus të Yekaterinburg, rreth 2,000 kilometra në lindje të Moskës.