Nënkryetarja e Partisë Demokratike të Kosovës, Vlora Çitaku bashkë me Sekretarin e Përgjithshëm të partisë, Bajrush Xhemaili, nënkryetarin e Kuvendit të Kosovës nga radhët e PDK-së, Enver Hoxhaj, dhe deputetet Eliza Hoxha e Ariana Musliu – Shoshi, ka pritur në takim ministrin për Evropën dhe Punët e Jashtme të Shqipërisë, Igli Hasani dhe ekipin e tij.

Gjatë takimit u diskutua për gjendjen aktuale politike në vend dhe fuqizimin e marrëdhënieve vëllazërore mes dy shteteve, shkruan Arbresh.info.

Duke e falënderuar ministrin Hasani për vizitën dhe mbështetjen e vazhdueshme të shtetit shqiptar për Kosovën, Çitaku theksoi se PDK si përherë do të vazhdojë të angazhohet në kultivimin e raporteve të mirëfillta vëllazërore me Shqipërinë.

“Shqipëria nuk është një fqinj i rëndomtë i Kosovës, dhe raportet mes Kosovës dhe Shqipërisë janë më të thella e shumëfish më të fuqishme se kokëçarjet e shkaktuara nga liderët e përkohshëm”, tha ajo.

Ministri Hasani theksoi se anëtarësimi i Kosovës në NATO është një nga prioritetet e kryesisë shqiptare të Kartës SHBA – Adriatike përgjatë vitit 2024. Ai u zotua se Shqipëria do të vazhdojë mbështesë Kosovën në rrugën e saj drejt integrimit në Bashkimin Evropian dhe anëtarësimit në organizata rajonale e ndërkombëtare.

“Shqipëria është dhe do të vazhdojë të jetë një mbështetëse e fuqishme e politikës së dyerve të hapura”, tha ai./Arbresh.info/