Sekretari i Zyrës ndërlidhëse të Kosovës në Serbi, Fatmir Haxholli, ka shpërndarë në Facebook një fotografi të automjetit të dëmtuar të babait të tij, pasi që u godit nga një plumb qorr gjatë festimeve.

Haxholli ka bërë thirrje për ndalimin e përdorimit të armëve në festa, duke theksuar rrezikun e madh që sjell ky veprim, shkruan Arbresh.info.

“Vetura e babës, e goditur me një predhë qorre. Festimi me armë është impuls post traumatik i atyre që hamendësojnë që fuqia buron vetëm përmes tytës së armëve, apo kujtojnë që kompleksi i inferoritetit kompensohet përmes krismave të tyre. Përmes tytave, vetëm në gjendje lufte mund të dëshmohet fuqia, jehona, kontrolli dhe dominanca.”, shkroi Haxholli.

Sipas tij, gjuajtja me armë është e pafalshme.

“E pafalshme të gjuhet me armë, duke ditur se dikush, diku, mund të pësoj nga një sjellje e tillë me zero përgjegjësi!”, u shpreh ai./Arbresh.info/