Ukraina pretendon se ka goditur një depo të madhe nafte të kontrolluar nga Rusia pasi një tren që transportonte municione dhe karburant në territorin e pushtuar gjithashtu shpërtheu në një sulm të dyshuar sabotazhi.

Skena dramatike u shpalos pas një shpërthimi dhe zjarri të madh në objektin ku ruhej nafta në rajonin e Donjetskut pas granatimeve intensive.

Në total ishin katër depozita të mëdha nafte në objektin që ndodhet në rrethin e Budennovsky. Nafta në depot që shpërthyen besohet se do të përdorej nga trupat ruse të stacionuara në zonë.

“Është e vështirë të vlerësohet dëmi në depon e naftës, por zjarri i gjerë tregon dëmtim të rezervuarit ose stacioneve nëntokësore të ruajtjes së karburantit”, thuhet në një raportim të kanalit ushtarak në Telegram.

Partizanët pro-Kievit hodhën po ashtu në erë trenin që përdorej për të transportuar karburant dhe municione nga Krimea e aneksuar në Melitopol dhe Dniprorudne, të dyja qytete në rajonin e Zaporizhzhia.

“Si rezultat i shpërthimit të kontrolluar, u dëmtuan hekurudha dhe një lokomotivë me disa vagona. Vetë shpërthimi ndodhi në orën 08:00 të mëngjesit. Pushtuesit kanë rrethuar vendin e shpërthimit dhe po kontrollojnë zonën përreth. Falë heronjve të nëntokës, treni më në fund përfundoi lëvizjen e tij”, njoftoi qendra ukrainase e rezistencës kombëtare.

Sipas ukrainasve ky ishte sulmi i 11-të i supozuar sabotues këtë vit në trenat rusë të lidhur me luftën, por Rusia nuk e ka pranuar humbjen e lidhjes kryesore hekurudhore me Krimenë./A2CNN