Kryeministri i Kosovës, Albin Kurti ka thënë se e ka marrë me dhimbje lajmin për vdekjen e profesorit, Shyqri Nimani.

Përmes një postimi në “Facebook”, Kurti ka thënë se Nimani është figura qenësore e fillesave dhe zhvillimit të dizajnit grafik në Kosovë.

“Me pikëllim mora lajmin sot për vdekjen e profesorit, dizajnerit grafik, dhe autorit Shyqri Nimanit. Profesor Nimani është figura qenësore e fillesave dhe zhvillimit të dizajnit grafik në Kosovë si fushëveprim, ku ka qenë edhe bartës i proceseve të ngritjes profesionale e arsimore të gjeneratave të reja të kësaj fushe në vend”, ka shkruar Kurti.

Tutje Kurti tha se ai do të mbahet në mend si kaligrafi i deklaratës origjinale të pavarësisë së Republikës së Kosovës që është nënshkruar më 17 shkurt 2008.

“Si figurë kozmopolite, ishte nxitësi dhe organizatori kryesor në themelimin e Galerisë Kombëtare të Kosovës, dhe të koleksionit të saj. Autor i shumë veprave mbi dizajnin grafik, tipografinë dhe artin në përgjithësi. Në mesin e shumë kontributeve dhe veprave, profesor Nimani do të mbahet në mend edhe si kaligrafi i deklaratës origjinale të pavarësisë së Republikës së Kosovës që është nënshkruar më 17 shkurt 2008. Me shumë kujdes dhe pasion puna e profesor Nimanit ka vazhduar e pandërprerë deri në ditët e fundit të jetës së tij. Ngushëllime familjarëve, të afërmve dhe gjithë komunitetit kulturor”, tha në fund kryeministri Kurti.

lexo edhe:

Vdes profesor Shyqri Nimani