Kuvendi komunal i Mitrovicës së Veriut sot ka marrë vendim, për lirimin e urës së Ibrit për qarkullimin e automjeteve dhe lëvizje të lirë, pas një kohe të gjatë.

E pas vendimit të kuvendit komunal të veriut të Mitrovicës, ka reaguar edhe Lista Serbe përmes një shkrimi në “facebook”, të cilët kërkuan që KFOR-i, EULEX-i dhe përfaqësuesit e bashkësisë ndërkombëtare të pengojnë zbatimin e këtij vendimi.

Siç vlerësuan nga ky Lista Serbe, vendimi shkel marrëveshjet e Brukselit dhe kërcënon drejtpërdrejt paqen.

“Duam të paralajmërojmë se hapja eventuale e urës padyshim që do të rezultojë me incidente në këtë zonë, gjë që duket se është qëllimi i Prishtinës. Ura ku ndodhën më shumë se njëmijë sulme me motive etnike nga jugu në veri është një simbol i vuajtjes së popullit serb dhe synimi i Prishtinës për të dëbuar serbët e mbetur nga i vetmi mjedis urban në të cilin ata mbijetuan në numër më të madh. Ky vendim i paligjshëm dhe jolegjitim i marrë nga kuazi-këshilltarët pa asnjë legjitimitet në mesin e qytetarëve, do të ketë pasoja të mëdha për paqen, sigurinë dhe bashkëjetesën në këto zona. Njëkohësisht, është vazhdimësi e pushtimit të veriut nga Albin Kurti, i cili u mësua me rolin e pushtimit Gauleiter”, thuhet në postim.

Lista Serbe tha se kërkon nga KFOR-i, EULEX-i dhe përfaqësuesit e bashkësisë ndërkombëtare që ta pengojnë sa më shpejt zbatimin e këtij vendimi, t’i japin hapësirë ​​për zgjidhjen e çështjeve të hapura në dialog dhe në këtë mënyrë të ruajnë dhe paqen.

“Parandalimi i lëvizjeve të tilla nga Prishtina dhe këshilltarët e Kurtit do të ishte në përputhje me kërkesat e bashkësisë ndërkombëtare për të ndalur të gjitha veprimet që cenojnë procesin e dialogut”, përfundon postimi./Arbresh.info/