Partia Demokratike e Kosovës do të propozojë një rezolutë për shkarkimin e ministres së Industrisë, Tregtisë dhe Ndërmarrësisë, Rozeta Hajdari.

Këtë e ka bërë të ditur të hënën, shefi i Grupit Parlamentar të PDK-së, Abelard Tahiri, raporton arbresh.info.

Tahiri pas mbledhjes së Kryesisë së Kuvendit, tha se në seancën e ardhshme të Kuvendit partia e tij do ta propozojë një rezolutë për shkarkimin e ministres Hajdarit.

Sipas tij, kërkesa e PDK-së për shkarkimin e saj vjen, pasi ajo nuk mund ta mbajë postin e ministres, kur është e dënuar.

Para mediave, Tahiri tha se qëndrimi i Hajdarit në Qeveri, si ministre e dënuar, është dëm i madh për vendin.

“Të mërkurën do kemi një pikë të propozuar nga PDK. Ka të bëjë me gjendjen në Ministrinë e Tregtisë dhe ne për këtë e kemi propozu një rezolutë për shkarkimin e ministres, Rozeta Hajdari. Qëndrimi i saj si ministre e dënuar është një dëm i madh për vendin tonë. Shto faktin se e ka pru këtë dikaster në gjendje shumë të keqe. Shpresoj që kryeministri Kurti të shqyrtojë këtë kërkesë dhe ta shkarkojë atë nga kjo pozitë”, u shpreh Tahiri./arbresh.info/

LEXO EDHE

Kusari-Lila: Qeveria nuk ka asnjë përplasje me SHBA-të – Arbresh.info