Katër trajnerëve të Kombëtares së Kosovës u është ndërprerë bashkëpunimi. Ramiz Krasniqi, Arsim Abazi, Kushtrim Munishi dhe Arben Simitçiu nuk do të jenë më në detyrat që i kishin deri tash. Kjo pas mbledhjes së Komitetit Ekzekutiv të Federatës së Futbollit të Kosovës.

“KE analizoi dhe shqyrtoi punën dhe rezultatet e Kombëtareve U19 meshkujt, U17 dhe U19 të femrave si dhe Kombëtares A në futsall. Ndaj në bazë të rezultateve të treguara FFK-ja nuk do të vazhdojë bashkëpunimin me përzgjedhësit dhe bashkëpunëtorët e tyre, me Ramiz Krasniqin përzgjedhës i Kombëtares U19, me Arsim Abazin përzgjedhës i Kombëtares U17 të meshkujve, me Kushtrim Munishin përzgjedhës i Kombëtares U19 të femrave si dhe Arben Simitçiu përzgjedhës i Kombëtares A futsall”, ka njoftuar FFK.

Ndërkohë, FFK ka bërë të ditur se ka miratuar draft-Statutin e ri për të cilin ka punuar Komisioni i FFK-së, së bashku me ekspertët e UEFA-s, e të cilin KE i FFK-së e ka vlerësuar si një Statut shumë të avancuar.

“Për miratimin e këtij Statuti, KE caktoi për datën 27 janar Kuvendin e Jashtëzakonshëm të FFK-së, me vetëm një pikë të Rendit të ditës, Miratimi i Statutit të ri dhe Akteve tjera të nevojshme”, thuhet tutje në njoftim.

Po ashtu, KE i FFK-së ka vendosur që ndeshja e Superkupës, ndërmjet Ballkanit dhe Llapit, të zhvillohet më 27 janar, në Antalia, duke pasur parasysh se të dyja skuadrat do të jenë në fazë përgatitore në bregdetin turk.