Ministri i Mbrojtjes, Armend Mehaj ka dënuar çasjen e Serbisë për destabilizimin e vendit me largimin e serbëve nga institucionet e Kosovës.

Përmes një postimi në rrjetin social Facebook, Mehaj thotë se Ministria e Mbrojtjes mbetet e përkushtuar për të garantuar sovranitetin e vendit dhe mbrojtjen e qytetarëve të Kosovës pa dallim etnie.

“Si ngritja e kapaciteteve ushtarake serbe në kufirin me Republikën e Kosovës, ashtu dhe vendimi i pjesëtarëve të komunitetit serb për largim nga institucionet e Kosovës janë veprime me tentim destabilizimin e vendit. I vetmi kërcënim për komunitetin serb janë individët dhe grupet kriminale serbe të dirigjuara nga Beogradi, veprimtaria e të cilëve duhet ndalur sa më parë, dhe për këtë jemi në koordinim të vazhdueshëm me Policinë e Kosovës, si dhe me misionin e KFOR-it” thuhet në reagimin e Mehajt.

Mehaj apelon te të gjithë qytetarët serb që të mos bien pre e dezinformimit dhe të jenë vigjilent.

“Prandaj, apelojmë të gjithë qytetarët e vendit e specifikisht qytetarët tanë të komunitetit serb, që të jenë vigjilent, të mos manipulohen dhe të mos bien pre e dezinformatave që janë pjesë e skenarëve të orkestruar pandërprerë nga Serbia dhe mekanizmat e saj të njohura e të praktikuara edhe në të kaluarën. Republika e Kosovës dhe institucionet e saj janë në shërbim të të gjithë qytetarëve, andaj angazhimi në to dhe respektimi i tyre është përgjegjësia jonë e përbashkët”, tha Mehaj në fund./arbresh.info/