Departamenti Amerikan i Shtetit miratoi shitjen e armëve për Tajvanin e cila ka një vlerë totale prej 1.1 miliard dollarë, transmeton Anadolu Agency (AA).

Agjencia Amerikane për Bashkëpunimin e Sigurisë së Mbrojtjes njoftoi se ka miratuar 3 paketa të ndara të shitjes së armëve për Tajvanin.

Në njoftimin e dërguar Kongresit, thuhet se për Programin e Radarit Vëzhgues të Tajvanit është dhënë miratimi për shitjen e mbështetjes logjistike në vlerë prej 665.4 milionë dollarë.

Ndërsa në dy njoftime të tjera të ndara bëhet e ditur se është dhënë miratimi për shitjen e 60 raketave anti-anije “Harpoon Blok-II” dhe pajisjeve përkatëse në vlerë prej 355 milionë dollarë si dhe shitja e 100 raketave taktike “AIM-9X Blok-II Sidewinder” që përdoren në avionët F-16 në vlerën 85.6 milionë dollarë.

Ka tërhequr vëmendjen se miratimi i kësaj shitjeje ka ardhur në një periudhë ku Kina ka rritur veprimet e saj ushtarake përreth Tajvanit.

Miratimet e shitjes së armëve nënkupton se shitja nuk përbën ndonjë problem në aspektin e administratës së SHBA-së.

Nëse Kongresi Amerikan nuk e kundërshton vendimin e Departamentit brenda 15 ditëve për anëtarët e NATO-s dhe 30 ditë pune për vendet jo anëtare të NATO-s, administrata fillon negociatat për përmbajtjen e paketës së shitjes me vendin ku jepet miratimi për kryerjen e shitjes.

Në fund të këtyre bisedimeve SHBA-ja i ofron vendit një letër propozim. Procesi i furnizimit fillon nëse merret përgjigje pozitive ndaj këtij propozimi.