Këshilltarët nga komunat e Mitrovicës veriore, Zveçanit, Leposaviqit dhe Zubin Potokut sollën një deklaratë me konkluzione të përbashkëta në seancën e përbashkët.

Pas seancës tekstin e deklaratës e lexoi kryetari i Kuvendit të Komunës së Zveçanit, Srđan Milosavljeviq.

Në këtë dokument, ata mbështesin presidentin e Serbisë, Aleksandar Vuçiq, që përmes dialogut dhe në përputhje me interesat e qytetarëve serbë, të gjejë një zgjidhje kompromisi, të qëndrueshme dhe afatgjatë për problemin e targave dhe kartave të identitetit, duke ruajtur paqen, stabilitetin dhe sigurinë në shtatë ditët e ardhshme.

“Ne i bëjmë thirrje komandës së misionit të KFOR-it që të parandalojë ardhjen e njësive speciale të armatosura të policisë së Kosovës nga Prishtina në komunat serbe”, thuhet në deklaratë.

Njëkohësisht, thuhet që “serbët që të mos bien në grackën e vendimeve të njëanshme dhe ofertave joshëse të Albin Kurtit për targa dhe dokumente personale, pasi kjo nuk është në përputhje me marrëveshjen e Brukselit”, shkruan Kosovo online transmeton arbresh.info.

“Ne, përfaqësuesit politikë, do të jemi gjithmonë përball popullit tonë dhe do të luftojmë për paqen dhe të drejtën e tij për një jetë të denjë. Ne i sigurojmë qytetarët se kemi marrë garanci të qarta dhe të forta nga presidenti ynë, Aleksandar Vuçiq se nuk do të lejohen persekutimet e popullit tonë dhe se populli serb nuk do të jetë i vetëm në këto kohë të vështira dhe sfiduese. Jemi të vendosur për paqe dhe dialog, për kompromis dhe zgjidhje afatgjata, por për dialog është gjithashtu e nevojshme që pala tjetër të respektojë interesat e popullit tonë dhe të respektojë detyrimet e marra përsipër”, thuhet në deklaratë.

Në rast se nuk arrihet një zgjidhje kompromisi, ata thanë se do të fillojnë procesin e largimit nga të gjitha institucionet e Kosovës në të gjitha nivelet, duke filluar nga institucionet qendrore dhe lokale, e duke përfunduar me gjykata, prokuroria, polici dhe të gjitha institucionet e tjera./arbresh.info/