Dita Ndërkombëtare Kundër Korrupsionit – 9 Dhjetori – shënohet sot edhe në Kosovë. Për këtë ditë janë paraparë të mbahen tryeza, performanca të ndryshme, si dhe do të ndahen shpërblimet për gazetari me temë kundër korrupsionit.

Me rastin e kësaj Dite, Oda Ekonomike Amerikane në Kosovë organizon tryezën: “Lufta Kundër Korrupsionit: Mision i Mundshëm”, ndërsa Lëvizja FOL do të bëjë hapjen e Qendrës Edukative Kundër-Korrupsion, me ç’rast Ambasadorja Holandeze Gerrie Willems do të mbajë një fjalim rasti.

Për ditën Ndërkombëtare kundër Korrupsionit një konferencë për media do të mbajë Instituti Demokratik i Kosovës, kurse Qendra për studime të avancuara FIT do të organizojë një ceremoni që të shënoje rëndësinë e kësaj dite.

Me po të njëjtin rast, Asociacioni i Gazetarëve të Pavarur të Kosovës, Agjencia Kundër Korrupsionit dhe UNDP do të dorëzojnë shpërblimet për gazetari me temë kundër korrupsioni.

Po ashtu në orët e mbrëmjes Programi i Kombeve të Bashkuara për Zhvillim (UNDP) në Kosovë do të shpallë fituesit e garës për foton më të mirë online të lansuar me fushatën “#fajikorrupsionit”.

Sot 12 vjet më 9 dhjetor 2003 në Kombet e Bashkuara u mblodhën më shumë se 100 përfaqësues shtetesh nga e mbarë bota për të nënshkruar Konventën Ndërkombëtare Kundër Korrupsionit.

Përmes këtij akti shtete të ndryshme, demonstruan gatishmërinë e një mobilizimi të përbashkët si asnjëherë më parë përtej kufijve nacional për të vendosur rregulla, parime dhe principe të cilat sot e asaj dite janë në betejë kundër të keqes së quajtur Korrupsion.