Zyra për Çështje të Kategorive të Dala nga Lufta e UÇK-së thotë se nuk ka pranuar kërkesë për protezat e invalidëve veteranë.

Sipas njoftimit dërguar nga Zyra e Kryeministrit kërkesa e fundit për proteza ka ndodhur në qeverisjen e kaluar, ku ishte ndarë buxhet dhe se shoqata e invalidëve është në zbatim të asaj kërkese.

“Zyra për Çështje të Kategorive të Dala nga Lufta e UÇK-së, ju informon se nuk ka pranuar kërkesë për sa i përket protezave për invalidë veteranë e të cilën nuk e ka trajtuar. Kërkesa e fundit në lidhje me protezat për invalidë veteranë ka ndodhur vitin e kaluar gjatë qeverisjes së kaluar, ku është ndarë buxhet dhe shoqata e invalidëve veteranë është në zbatim e sipër të asaj kërkese”, thuhet në komunikatë.

Kjo zyrw ka thënë se është e hapur për shqyrtim dhe trajtim të çfarëdo kërkese, dhe çështjet e këtilla si ofrimi i protezave për invalidë veteranë do të konsiderohen ashtu siç edhe janë, esenciale.

Për këtë çështje tw dielën deputeti i Aleancës për Ardhmërinë e Kosovës (AAK), Ramush Haradinaj, ka akuzuar Qeverinë Kurti se nuk po i trajton invalidët e luftës.

“Ato proteza duhet të ndërrohen periodikisht dhe pasi që janë të papërballueshme për xhepin e invalidëve, zakonisht qeveria merr përsipër këto shpenzime. Në mungesë të trajtimit dhe kujdesit për invalidët e luftës nga kjo qeveri, ka pasur organizim nga bashkatdhetarët, në rastin e ndërrimit të protezave për luftëtarët e dalluar të UÇK-së Naim Qerimaj dhe Selmon Hasanaj”, ka shkruar Haradinaj në Facebook.