Kryeinfermierja e Klinikës së Kirurgjisë në Qendrën Klinike Universitare të Kosovës (QKUK) është kthyer në punë me vendim të Inspektoratit të Punës, ndonëse ajo ishte kapur nga menaxhmenti i QKUK-së si e dyshuar për vjedhjen e albuminave të pacientëve.

Dyshimet fillestare që kanë çuar në largimin e Emine Ramës nga vendi i saj i punës janë se ajo ka vjedhur albumina në vlerë prej rreth 30 mijë eurove dhe të njëjtat i ka nxjerrë nga QKUK, me qëllim që t’i shiste nëpër barnatoret private.

Por, varësisht vendimit të Komisionit Disiplinor të QKUK-së për largimin e kësaj infermiereje nga vendi i saj i punës, është Inspektorati i Punës ai që e ka kthyer me një vendim tjetër në punë infermieren Rama.

E njëjta ishte edhe nën arrest para disa muajsh me dyshimin e dëmtimit të buxhetit të shtetit dhe se Prokuroria është duke i vazhduar hetimet në lidhje me dyshimet për vjedhje.