Kreu i Partisë Demokratike Lulzim Basha ka komentuar vënien në funksion të Gjykatës Kushtetuese, pasi u plotësua me gjashtë anëtarë.

Gjatë një takimi me studentët e drejtësisë, Basha tha se u deshën tre vjet për të ngritur Kushtetuese. Megjithatë, Basha e cilësoi lajm të mirë, por shumë të vonuar.

“U deshën 3 vjet të plotësoheshin vakancat në Gjykatën Kushtetuese. Padiskutim që është një lajm i mirë, por shumë i vonuar. Me qeverisje e ardhshme drejtësia nuk do të jetë pronë e qeverisë. Askush nuk do të mund ta akuzojë qeverinë e ardhshme që e ka marrë peng drejtësinë”, deklaroi kryedemokrati.

Basha më tej u ndal tek shqetësimet e të rinjve dhe largimet nga vendi. Kreu i demokratëve premtoi që do të bëjnë gjithçka për të frenuar largimin e të rinjve.

“Beteja kryesore e ime është që ta pamundësojmë këtë largim. Të largohet gjysma e rinisë, është largim nga dëshpërimi. Ky është një vend me mundësi të jashtëzakonshme. Me një vendodhje gjeografike që na kanë lakmi. Nuk mundet që juristi të përfundojë te dera e një dyqani që nuk futet asnjë klient. Që rinia ta gjejë veten këtu na duhet një ekonomi që prosperon”, tha ai./abcnews.al