Kina deklaroi se raketa e saj vendore e sapondërtuar bëri një fluturim të suksesshëm në hapësirë me pesë satelitë, transmeton Anadolu Agency (AA).

E konsideruar si një shtytje e madhe në projektin e programit hapësinor të Kinës, raketa e re prej 356 tonësh nga seria Long March theksohet se “do të bëhet e ripërdorshme 10 herë deri në vitin 2025 dhe deri më 2035”, raportoi e përditshmja kineze “Global Times”.

Satelitët u lançuan nga provinca ishullore tropikale e Kinës Hainan në pjesën jugore të vendit.

Projektuesit e raketës Long March-8 thanë se raketa e re është e aftë të lançojë një “ngarkesë prej tre deri në katër e gjysmë tonë në Orbitën Sinkrone të Diellit”.

Raketa është e gjatë 50,3 metra, ka një fazë thelbësore me diametër 3,35 metra dhe dy përforcues anësorë me diametër 2,25 metra.

Akademia Kineze e Teknologjisë së Lançimit të Mjeteve, një vartëse e Korporatës Shtetërore të Shkencës dhe Teknologjisë Kineze të Hapësirës Ajrore, projektoi modelin e ri të serive Long March.

Kina ka lançuar më shumë se 350 raketa nga kjo seri e prodhuar në mënyrë vendore të Long March deri më tani.

Xiao Geng, komandanti i përgjithshëm i raketës, tha: “Fluturimi i suksesshëm i Long March-8 do të thotë shumë për përpjekjet e Kinës për t’u ngritur në një fuqi hapësinore, pasi do të shtyjë me forcë përpara azhurnimin e lançimit të Kinës të mjeteve me madhësi të mesme, dhe do të drejtojë zhvillimin e satelitëve të vendit në orbita të mesme dhe të ulëta, si dhe do të plotësojë kërkesat e lançimit për këto anije kozmike”.

Kina planifikon të inaugurojë stacionin e saj të madh hapësinor modular këtë vit i cili do të vendoset në orbitë të ulët. Do të jetë afërsisht një e pesta e masës së Stacionit Hapësinor Ndërkombëtar dhe afërsisht sa madhësia e stacionit hapësinor “Mir” të Rusisë.

Inxhinierët e hapësirës ajrore të vendit do të përdorin raketa me përmasa të mëdha Long March-5B për të lançuar modulet e stacionit hapësinor.

Modeli i ri i Long March-8 është quajtur “versioni kinez i SpaceX Falcon 9” për potencialin e tij për t’u ripërdorur.

Falcon 9 është një mjet lansimi pjesërisht i ripërdorshëm i projektuar dhe prodhuar nga kompania e raketave dhe anijeve kozmike me bazë në SHBA SpaceX.