Ministri gjerman i Financave, Olaf Scholz, thekson se me bashkëpunim më të ngushtë mes qeverive, ekonomia e Bashkimit Europian mund ta kalojë krizën që po kalon nga Covid-19.

Gjermania mendon se ekonomia e Eurozonës mund të rikthehet në nivelet para krizës epidemike brenda dy viteve nëse liderët europianë punojnë së bashku.

Fondi Monetar Ndërkombëtar njoftoi të martën se ekonomia e Eurozonës parashikohet të tkurret me 8,3 për qind në 2020-ën, pasi në qershor kishte paralajmëroi uljen mbi 10 për qind.

Për ministrin gjerman të Financave, Olaf Scholz, efektet e pandemisë i ka zbutur disi solidariteti që shtetet anëtare treguan për vendet më të goditura.

Kjo synohet të arrihet me rënien dakord për të financuar mbi 1 trilionë euro deri në vitin 2027 dhe për të marrë hua 750 miliardë euro të tjera për grante e kredi për dëmet nga koronavirusi.

“Fakti që Europa po bashkëvepron po e ndihmon vërtet ekonominë por po ndihmon edhe në aspektin që tani të gjithë e kuptojnë se Europa është e zonja ta luftojë këtë krizë. Unë jam i idesë se jemi të fortë dhe se Europa vetë do të dalë më e fortë nga kjo.”

Parlamenti Europian prej muajsh nuk po bie dakord për projektet e propozuara, duke kërkuar më shumë financime për sektorë si shëndetësia, infrastruktura apo mjedisi, dhe për ta kushtëzuar shpërndarjen e fondeve për vendet që kanë nivel më të dobët demokracie dhe sundimi të ligjit, siç janë Polonia apo Hungaria.

Sholc shpreson që shtetet anëtare do ta votojnë buxhetin e BE-së brenda muajit tetor.

“Jam optimist se do t’i zgjidhim problemet që paratë të jenë gati për përdorim nga fillimi i vitit të ardhshëm. Kemi edhe presidencën e BE-së ndaj po punojmë intensivisht t’i bindim të gjithë se kjo është koha për kompromis.”

Sipas FMN-së, Eurozona do i rikthehet rritjes me 5,2 për qind në vitin 2021, ndërsa nga shtetet e saj, ekonomia gjermane do ulet me 6 për qind në 2020-ën, dhe Spanja, që varet më shumë nga turizmi, pritet të pësojë një tkurrje me 12,8 për qind të aktivitetit ekonomik për këtë vit.