Ministrja e Kulturës, Rinisë dhe Sportit Vlora Dumoshi e ka vizituar sot Komunën e Rahovecit.

Ajo është takuar me kryetarin e kësaj komune Smajl Latifi me të cilin kanë biseduar për disa nga projektet kulturore-sportive, projekte këto që pritet të finalizohen në këtë komunë.

Dumoshi tha se në Rahovec po nisin projekte sportive, si Stadiumi Sportiv në Ratkoc si dhe stadiumi i qytetit, projekte këto që lidhen direkt me nevojat e qytetarëve.

“Ne si Ministri e Kulturës, Rinisë dhe Sportit në të gjitha komunat e Kosovës bashkëpunojmë, nënshkruajmë marrëveshje, memorandume që lidhen direkt ku qytetarët përfitojnë nga projektet. Jemi në procedurë të tenderimit për dy projekte që janë të rëndësishme për komunën e Rahovecit. Për stadiumin në Ratkoc është paraparë vlera 800 mijë euro. Ndërkaq për stadiumin e futbollit në qytetin e Rahovecit është paraparë vlera 2 milionë euro. Gjithashtu e kemi edhe ndërtimin e palestrës sportive në Krushë të Madhe”.

Dumoshi dhe Latifi shfrytëzuan rastin të vizitojnë edhe shtëpinë-muze të atdhetarit Ukshin Hoti në Krushë të Madhe.

“Një vizitë kjo emocionuese, e cila të sjellë ndër mend fatin akoma të pandriçuar, sakrificën në burgje e aktivitetin e pareshtur të Ukshin Hotit për çështjen e Kosovës”.

Ministrja e Kulturës ka shpalosur në Rahovec edhe projektin që ka të bëjë me historinë gojore për tragjeditë që ka kaluar Kosova në luftën e fundit.

Në këtë projekt do të përfshihen rrëfimet e dëshmitarëve të Masakrës së Krushës së Madhe. Ajo tha se ky projekt është mbështetur edhe nga Ambasada Amerikane.

Projekti i historisë gojore “Rrëfime gojore të dëshmitarëve të masakrës së Krushës së Madhe” do të realizohet nga Biblioteka Kombëtare e Kosovës dhe Departamenti i Antropologjisë i Fakultetit Filozofik të Universitetit të Prishtinës.

E para e ministrisë foli për rëndësinë e projektit të historisë gojore duke shtuar që ky projekt do t’i kontribuonte ruajtjes së kujtesës kolektive.

“Është një projekt i cili është i një rëndësie shumë të madhe, projekti i historisë gojore, me rrëfimet gojore të dëshmitarëve të masakrës së Krushës së Madhe. MKRS-ja me një kujdes shumë të veçantë do të përkrahë edhe këtë profil të mbledhjes së historisë gojore se çka ka ndodhur në Kosovë. Ne do t’i vendosim në pah dhe këto dokumente dhe librat të cilat do të përkthehen edhe në gjuhë të tjera“.

Kryetari i Rahovecit tha se është i kënaqur që ministrja Dumoshi po i përkrah projektet e rëndësishme sportive e kulturore për qytetarët e kësaj komune.

Ministrja e Kulturës, Rinisë dhe Sportit, Vlora Dumoshi ka vizituar edhe hapësirën ku po planifikohet ndërtimi i stadiumit të qytetit.