Ministri Krasniqi zotohet se do të jetë zëri i bizneseve të Kosovës

14:50 | 28 Korrik 2020
Arbresh.info

Ministri i Tregtisë dhe Industrisë, Vesel Krasniqi, së bashku me kryetarin e Odës Ekonomike Amerikane në Kosovës (OEAK), Arian Zeka, zhvilluan sot një takim virtual me përfaqësues të bizneseve, me të cilët biseduan për situatën e tyre të krijuar si pasojë e pandemisë COVID-19.

Ministri Krasniqi falënderoi, Zeka për organizimin e këtij forumi virtual, duke theksuar se do të jetë zëri i të gjitha bizneseve të Republikës së Kosovës, shkruan Arbresh.info.

Ai theksoi se në kuadër të masave për parandalimin e përhapjes së pandemisë COVID-19, ndër të tjera po shqyrtohet mundësia e zgjatjes së orarit të bizneseve të gastronomisë si dhe mundësimi i shërbimit “Take aeway” përgjatë 24 orëve.

Po ashtu, ministri Krasniqi tha se pas votimit të Ligjit për Rimëkëmbjen Ekonomike në Kuvendin e Kosovës, do t`i hapet rruga Qeverisë së Kosovës për t`i ndihmuar bizneset në përballimin e kësaj situate.

Ai potencoi se fokus i Ministrisë së Tregtisë dhe Industrisë do të jetë mbrojtja e konsumatorëve dhe prodhuesve vendorë.

Nga ana tij, kryetari i Odës Ekonomike Amerikane, Arian Zeka, tha se do të jetë përherë zë mbështetës për bizneset në mënyrë që t`u jepet zgjidhje sfidave të tyre në këtë situatë pandemie. Ai theksoi se Pakoja për Rimëkëmbjen Ekonomike ka marrë vlerësim të kënaqshëm, por që nuk është e mjaftueshme duke qenë se pandemisë aktualisht nuk po i dihet fundi.

Në takim u bisedua edhe për implementimin e Ligjit për Investime Strategjike, me ç ‘rast ministri Krasniqi tha se është formuar një komision ndërministror për këtë çështje dhe njëkohësisht premtoi përkrahje për të gjithë investitorët strategjikë, që shprehin gatishmëri për të investuar në vendin tonë.