Morën premtime se nuk do të shpërngulen nga bjeshkët e tyre, mirëpo banorët e bjeshkës së Zhlepit po maltretohen dhe dëbohen nga policia kufitare e Malit të Zi.

Pesë familje tashmë janë dëbuar me dhunë nga “Kulla e Zhlepit”, zonë kjo e cila ka qene pjesë e territorit të Kosovës  para nënshkrimit të Marrëveshjes për përcaktim të kufirit mes Kosovës dhe Malit të Zi.

Në mënyrë graduale dita-ditës banorët e kësaj bjeshke po shpërngulen.

Dëshmitar i gjithë këtyre torturave nga policia malazeze ishte Rasim Mulaj, banor i fshatit Llukë të Komunës së Deçanit, i cili ka disa muaj që ka dal në bjeshkët e Zhlepit.

Mulaj tregon se si këto pesë familje bashkë me fëmijë e të rritur janë detyruar t’i lëshojnë stanet e tyre të detyruar nga policia e Malit të Zi.

Edhe ky banor nga Poqeta e Pejës, është përballur me policët malazez. Ai tregon se si  është  ndier i rrezikuar në bjeshkët që ka lindur dhe është rritur.

Ish-deputeti i Kuvendit të Kosovës që ka kundërshtuar marrëveshjen për demarkacionin me Malin e Zi, Ali Lajçi ka thënë se ky dëbim po bëhet në mënyre graduale dhe të heshtur për t’i larguar kosovarët nga ajo zonë.

Lajci nuk beson se do të ndodh korrigjimi i kësaj marrëveshje.

Janë bërë rreth dy vite që kur Kuvendi i Kosovës e ka miratuar Marrëveshjen e Demarkacionit me Malin e Zi, me premtimin se i menjëhershëm do të jetë edhe vendimi për liberalizim të vizave.

Prej asaj kohe nuk ka ndodhur rishikimi i vijës kufitare, siç pretendonte pala kosovare, e as vendi nuk e ka fituar liberalizimin e vizave nga Bashkimi Evropian./Mira Avdimetaj/arbresh.info/