Në pikën kufitare me Malin e Zi, në Qakorr si pasojë e përfundimit të “gabuar” të demarkimit, forcat malazeze janë duke dëbuar banoret që me vite kanë paguar tatim per ato prona.

Ish-deputeti i Kuvendit të Kosovës Ali Lajqi përmes një postimi në facebook ka treguar një rast kur një qytetar nga fshati Llukë i komunës së Deçanit është dëbuar nga ajo prona që e kanë afër Kullës së Zhlepit.

Postimi i plotë:

Pasojat e votimit të versionit të gabuar kufitar me Malin e Zi!

Ky version i gabuar, të cilin e votuan deputetët e Republikës së Kosovës dhe partitë politike, ku humbën mijëra hektarë tokë po sjellë pasojat e veta.

Kësisoji ka filluar dëbimi i banorëve të Fshatit Llukë, nga forcat Malazeze, fshat i komunës së Deçanit që bjeshkën e kanë afër Kullës së Zhlebit dhe që tatimet i kanë paguar gjithmonë në Komunën e Pejës. (Shih fotografitë e bashkangjitura)

Ky dëbim po bëhet në mënyrë graduale e të heshtur, një nga një, në mënyrë shumë përfide, për pastrimin në baza etnike të asaj zone.

Banori dëshmitarë Rasim Mulaj, nga fshati Llukë informon se 5 (pesë) familje deri më tash janë dëbuar. Rasimi më pyet se kur do të korrigjohet kjo vijë kufitare?

“Zoti i vraft këta tanët jarabi” – kështu i mallkojnë banorët ata që e votuan!

Ftoj mediat dhe akterët tjerë që të përcjellin nga afër këtë situatë.