Kryetarja e Gjykatës Kushtetuese të Republikës së Kosovës, Arta Rama-Hajrizi, ka pritur në takim ambasadorin e Italisë në Kosovë, Andreas Ferrarese.

Siç bëhet e ditur në një njoftim për media, kryetarja Rama-Hajrizi fillimisht e njoftoi ambasadorin Ferrarese me çështjet e organizimit dhe të funksionimit të Gjykatës Kushtetuese, duke vënë theksin në kujdesin e treguar nga ky institucion për ruajtjen e pavarësisë nëpërmjet respektimit rigoroz të dispozitave kushtetuese në vendimmarrje.

“Ajo e vlerësoi si primare rëndësinë e komunikimit me gjykatat homologe të vendeve me gjyqësi kushtetuese shumëvjeçare, në funksion të progresit të mëtejshëm dhe të reformave gjithëpërfshirëse në sistemin e drejtësisë”, thuhet në njoftim.

Po sipas njoftimit, në takim u diskutua edhe për mundësitë e bashkëpunimit dhe për shkëmbimin e mëtejshëm të përvojave mbi mënyrën e funksionimit të sistemeve gjyqësore në të dy vendet, duke pasur në fokus rolin e gjykatave kushtetuese si organ qendror për interpretimin e Kushtetutës.

“Ambasadori Ferrarese i vlerësoi si të rëndësishme të arriturat e Gjykatës Kushtetuese dhe shprehu përkushtimin e Italisë që të thellojë bashkëpunimin me të gjitha institucionet e Kosovës në fushat me interes të ndërsjellë”, përfundohet në njoftim.