Problemet me lëndime të shumta gjatë këtij sezoni kanë bërë që mesfushori francez, Paul Pogba, të ketë mundësi të luajë në vetëm tetë ndeshje gjatë gjithë sezonit 2019/20 deri kur u pezulluan ligat përkohësisht, transmeton Gazeta Express.

Ai po bëhej gati për t’u kthyer në fushën e lojës në Old Trafford kur e gjithë bota u godit nga virusi Covid-19 dhe futbolli u pezullua përkohësisht që të mos përhapet edhe më shumë kjo pandemi.

Kjo ka bërë që Pogba ta ketë të pamundur të kthehet në fushën e blertë, përderisa ky sezon mbetet një sezon për t’u harruar për të personalisht. Ai vazhdon të jetë në qendër të vëmendjes, shkaku i spekulimeve për të ardhmen e tij.

Mirëpo, në intervistën e tij të fundit ai tentoi t’i injorojë këto spekulime për të ardhmen e tij, duke u përqendruar në vend të kësaj te dëshira e tij për t’u kthyer në fushën e blertë sa më shpejt.

“Me të vërtetë më mungon futbolli. Unë kam qenë i lënduar, kështu që kam qenë duke u stërvitur vetëm që rreth shtatë muaj”, ka thënë Pogba.

“Kur po bëhesha gati të kthehesha në fushë, u ngrit situata e koronavirusit, kështu që gjithçka u ndal”.

“Unë dua të kthehem dhe natyrisht të bëj punë të mrekullueshme. Kam munguar në shumë ndeshje dhe natyrisht që dua të jem versioni më i mirë i vetes”.

“Kështu që kur të kthehem dua ta tregoj më të mirën nga vetja dhe kur jam në shtëpi, s’ka asnjë justifikim”.