Këshilltari i presidentit të Republikës së Kosovës, Adil Behramaj thotë se ushtruesi i detyrës së ministrit të Punëve të Brendshme, Xhelal Svecla i ka dhënë dje leje speciale Aleksandër Jablllanoviqiti, ish-ministrit të shkarkuar, i cili i kishte fyer nënat gjakovare.

Përmes një postimi në Facebook, Behramaj ka publikuar edhe dokumentin e lejimit të lëvizjes./arbresh.info

Postimi i plotë:

Xhelal Sveçla, si ushtrues detyre i ministrit, dje i paska dhënë leje speciale për të lëvizur lirshëm në tërë territorin tonë edhe Aleksandër Jabllanoviqit, ish-ministrit të shkarkuar, i cili nënat që nuk i kishin lejuar pelegrinët serbë të hynin në Gjakovë i kishte quajtur edhe egërsira. Lëvizja Vetëvendosje atëherë e kishte shfrytëzuar këtë deklaratë të poshtër të tij për të organizuar protesta të dhunshme gjithandej Kosovës, duke e djegur në fund edhe objektin e Qeverisë. Tash qytetarët i kanë izoluar, deputetët e Kuvendit të Kosovës i kërcënojnë me arrestime, kurse Aleksandër Jabllanoviqit i japin edhe leje speciale për të lëvizur në tërë Kosovën. Na ka mbetur neve të skuqemi për paturpësinë e tyre!