Shukri Rrahimi nga Vërbica e Zhegovcit që nga sot është bërë me shtëpi të re.

Ky dhe familja e tij deri më tani jetonin në një shtëpi që nuk i ka plotësuar kushtet elementare për banim.

Shtëpia e familjes Rrahimi është ndërtuar me ndihmën e klubit të motoristëve nga Zvicra “Plisat”, të cilët kanë dhënë mjete për ndërtimin e kësaj shtëpie që u përurua sot.

Në përurimin e shtëpisë ka marrë pjesë kryesuesja Valentina Bunjaku Rexhepi, nënkryetari Rexhep Kadriu dhe përfaqësuesi i klubit të motoristëve “Plisat”, Bekim Dalipi.

Bekim Dalipi, përfaqësues i klubit të motoristëve “Plisat”, u shpreh i lumtur që kanë arritur ta bëjnë një familje me kulm mbi kokë, duke iu siguruar kushte shumë të mira për banim.

“Në fund të korrikut i premtuam kryetarit dhe sot, siç po e shihni, e ndërtuam këtë shtëpi me çelësa në dorë për këtë familje. Ka qenë dëshirë e jona që ta përzgjedhim një familje që jeton në një zonë rurale dhe Komuna e Gjilanit na e ka mundësuar këtë. Ne nuk do të ndalemi edhe në të ardhmen që t’u dalim në ndihmë njerëzve”, ka thënë Dalipi.

Pronari i shtëpisë Shukri Rahimi e ka falënderuar kryetarin Haziri dhe donatorin, ndërkaq është shprehur se kjo është dita më e lumtur e jetës së tij meqë ka hyrë në shtëpi të re.

Kjo është shtëpia e 17-të që po ndërtohet për familjet skamnore pas iniciativës e kryetarit të Komunës, Lutfi Haziri,i cili organizoi mbrëmjen humanitare “Pak nga ne, shumë për ata”, ndërsa pritet të ndërtohen edhe të tjera po këtë vit.