Të përçarë në raport me tarifën ndaj produkteve serbe vazhdojnë të jenë subjektet opozitare, ato në pushtet, por edhe vetë koalicioni qeverisës. Derisa kryeministri Albin Kurti ka paralajmëruar heqjen e pjesshme të taksës nga 15 marsi, LDK-ja po kërkon eliminimin e plotë të saj, kurse partitë e bllokut opozitar po kërkojnë mbajtjen e taksës deri në njohje nga Serbia, shkruan sot gazeta “Zëri”.

Tarifa 100% ndaj produkteve serbe dhe boshnjake, e vendosur nga ish-qeveria “Haradinaj”, po del të jetë mollë sherri mes partive qeveritare dhe atyre në opozitë, por edhe mes vetë koalicionit qeverisës. Shefi i Qeverisë, Albin Kurti, më 19 shkurt kishte propozuar një plan shtatëpikësh, ku paralajmërohej heqja e pjesshme e taksës që nga 15 marsi, me ç’rast Kurti vendosi disa kushte ndaj Serbisë, në mënyrë që tarifa në të ardhmen të hiqet në tërësi.

Mirëpo një gjë e tillë është kundërshtuar nga LDK-ja, e cila po kërkon të plotësohet kërkesa e partnerit strategjik të Kosovës SHBA-së dhe të hiqet taksa në plotësi. Në anën tjetër, të ndara janë edhe partitë opozitare, të cilat vlerësojnë se taksa duhet të hiqet vetëm atëherë kur Serbia e njeh Kosovën si shtet, shkruan tutje “Zëri”.

Ndërkohë, derisa spektri politik në vend mbetet i paunifikuar në raport me taksën ndaj produkteve serbe, Serbia në anën tjetër po vazhdon fushatën e saj denigruese ndaj Kosovës. Gjatë kësaj jave Serbia njoftoi se edhe Sierra Leone ka tërhequr njohjen ndaj Kosovës, duke e çuar shifrën e çnjohjeve në tetëmbëdhjetë.