Një grup protestuesish u mblodh në Teheran të shtunën për të vajtuar viktimat e avionit të rrëzuar në fillim të kësaj jave. Të afërm e miq të atyre që mbetën të vdekur gjatë incidentit u mblodhën pranë universitetit të Teknologjisë Amirkabir, dhe shprehën zemërimin e tyre ndaj qeverisë iraniane e bënë thirrje për dorëheqje të udhëheqësve të vendit të tyre lidhur me ngjarjen.

Irani tha të shtunën se ushtria e tij kishte e goditur gabimisht aeroplanin ukrainas, incident që shkaktoi vdekjen e të 176 personave në bord.

Qeveritë e huaja e dënuan këtë veprim. Ukraina kërkoi kompensim ndërsa një zyrtar amerikan e quajti veprimin e Iranit të pamatur. Por Britania tha se pranimi o përgjegjësisë nga ana e Teheranit ishte një hap i parë i rëndësishëm dhe bëri thirrje për ulje të tensioneve.

Në komentet e tyre në facebook iranianë të trishtuar nga humbja e të afërmve e miqve, thanë se autoritetet iraniane kishin shpenzuar më shumë kohë për t’u mbrojtur nga kritikat, sesa të shprehnin keqardhje për familjet e viktimave./voa/