Luis Suarez ka thënë se mundësia për ta braktisur Barcelonën për MLS-në – ligën elitare të futbollit në SHBA – mbetet opsion e mirë për të. Sulmuesi uruguaian i bëri këto komente në një kohë kur e ardhmja e tij në Camp Nou është e pasigurt.

32-vjeçari ka kontratë me Barçën deri në vitin 2021 dhe deri tani nuk ka pasur bisedime mes palëve për vazhdimin e saj.

Suarez i ka shënuar gjashtë gola në 10 ndeshje në La Liga për skuadrën e Ernesto Valverdes deri tani këtë sezon.

Së fundmi është raportuar se Suarez ka mundësi t’i bashkohet Inter Miamit, klubit të David Beckham.

Duke iu referuar bisedave me bashkatdhetarin e vet, mesfushorin e Seattle Sounder Nicolas Lodeiro, për interesimin e tij për të kaluar në MLS, Suarez tha për ESPN: “Nuk i premtova asgjë (Lodeiros). Vetëm biseduam.”

“MLS-ja është ligë në të cilën çdo lojtar do të ishte i interesuar të luajë. Unë e pyeta atë se çfarë gare është, si dhe për bashkëlojtarët e tij”, shtoi Suarez.

“Unë kam kontratë me Barçën dhe jam shumë i lumtur këtu. Ama të ardhmes s’i dihet, është ligë atraktive”, përfundoi ai. /Gazeta Express/