Fati i Shqipërisë dhe Maqedonisë së Veriut në rrugën drejt BE, varet vetëm nga takimi i kësaj të mërkure, mes kancelares gjermane Angela Merkel dhe presidenti francez Emmanuel Macron.

Sipas mediave gjermane në axhendën e bisedimeve do të jenë dhe hapja e negociatave për këto dy vende. Një përfaqësues i qeverisë së Kancelares, Angela Merkel tha për gazetën Ëelt se kancelarja do të trajtojë temën e negociatave me Macron të mërkurën në Këshillin e Ministrave Franko-Gjermane.

Ndërsa gazeta gjermane Frankfurter Allgemeine Zeitung shkruan se Parisi zyrtar po justifikon refuzimin e tij duke bërë thirrje për një rregullim thelbësor të procesit te zgjerimit te BE, para fillimit të bisedimeve të pranimit.

Një ditë më parë, Ministrat e Jashtëm të vendeve anëtare të BE-së u takuan në Luksemburg për të diskutuar hapjen e negociatave të pranimit të Shqipërisë dhe Maqedonisë së Veriut.

Vetëm Franca kundërshtoi hapjen e negociatave për pranimin e Maqedonisë së Veriut, ndërsa Holanda, Danimarka dhe Spanja e mbështetën atë, por bllokuan procedurën për Shqipërinë.

Finlanda e cila ka dhe presidencën e BE-së propozoi që të dy vendet të merrnin një vlerësim të veçuar, por kërkesa u refuzua sërish nga Franca.

Ndërkohë dokumenti zyrtar i përgatitur nga Presidenca finlandeze e Bashkimit Europian pas mbledhjes së ministrave të vendeve anëtare të BE-së në takimin e Këshillit të Çështjeve të Përgjithshme propozon hapjen e menjëhershme të negociatave me Maqedoninë e Veriut, ndërsa hapjen e negociatave me Shqipërinë e shtynë për gjysmën e parë të vitit 2020.