Komiteti për Liritë Qytetare, Drejtësi dhe Çështje të Brendshme – LIBE në Bashkim Evropian, ka votuar edhe një herë tjetër pro fillimit të negociatave me Këshillin e Ministrave të Bashkimit Evropian për liberalizimin e vizave për Kosovën.

Edhe në muajin gusht të vitit 2018, Komiteti LIBE kishte votuar të njëjtin rekomandim. Mirëpo, rekomandimi i këtij Komiteti nuk ishte votuar nga Parlamenti Evropian dhe nuk ishte vendosur asnjëherë në agjendën e Këshillit të Ministrave të BE-së.

Mirëpo, Komiteti LIBE, në ueb faqen e saj zyrtare bëri sot të ditur se çështja e vizave për Kosovën dhe rekomandimet e tjera të kaluara sot nga Komiteti “duhet të votohen në seancën e Parlamentit Evropian muajin e ardhshëm”.

.@EP_Justice also backed opening talks with @EUCouncil
re MFF files:
Pericles IV programme (64/2/0)
Rights & Values Programme (52/14/0)
Asylum and Migration Fund (40/24/2)
Instrument for financial support for border management & visa (49/16/1)
Internal Security Fund (52/6/8)

— LIBE Committee Press (@EP_Justice) September 24, 2019

Në një votim në Komitetin LIBE të martën, 49 anëtarë të këtij komiteti votuan pro fillimit të negociatave me Këshillin Evropian për liberalizimin e vizave për Kosovën, teksa 13 kanë votuar kundër këtij propozimi, raporton Insajderi.

Lajmin e ka bërë të ditur ueb faqja e Komitetit LIBE të BE-së në rrjetin social Twitter. Komiteti ka bërë të ditur se ky propozim duhet të konfirmohet nga Parlamenti Evropian, në mënyrë që të hyjë në fuqi.