Ndonëse ka emra konkretë të dyshuar për vrasjen e tyre, askush nuk është dënuar. Me emocione të mëdha rrëfeu për të kaluarën e familjes së tij.

Ky është Ilir Bytyqi, vëllai i Yll, Mehmet dhe Agron Bytyqit, të vrarë nga serbët saktësisht 20 vjet më parë.

Ilir Bytyqi thotë se vëllezërit e tij kanë qenë gjithnjë njerëz të mirë. Në kohën kur në Kosovë po zhvillohej një luftë e ashpër Yll, Mehmet dhe Agron Bytyqi vendosën të lënë rehatinë e Amerikës.

Ata u bënë pjesë e Ushtrisë Çlirimtare të Kosovës. E kur lufta përfundoi, ata u nisën të kthehen atje ku e kishin familjen e tyre.

Por, aksidentalisht ata përfunduan në territorin serb. Vëllezërit Bytyqi u arrestuan dhe kjo ishte hera e fundit që të njëjtit u panë të gjallë.

Njëzet vjet pas, akoma nuk ka drejtësi për vrasjen e tyre.Por, vëllezërit Bytyqi asnjëherë nuk i ka harruar Amerika.

Madje edhe në 20 vjetorin e vrasjes së tyre, ambasada e amerikane në Beograd, po kërkon drejtësi për 3 shtetasit e vet.

Familjarët thonë se malli për ta vetëm po shtohet. Ndërkohë që shpresat se do të zbardhet ky rast, nuk janë shuar.

E për të njëjtin rast, drejtësi ka kërkuar gjatë së martës edhe Presidenti i Kosovës, Hashim Thaçi. Sipas tij drejtësia ndërkombëtare ka dështuar në ndëshkimin e krimeve serbe.
Për këtë rast ka reaguar edhe kryeministri Ramush Haradinaj. Ai ka thënë se përgjegjës për këtë vrasje të trefishtë është shteti serb.
Me rastin e vëllezërve Bytyqi është marrë edhe Fondi për të Drejtën Humanitare. Bekim Blakaj, nga kjo organizatë, thotë se shpresë për zbardhjen e këtij rasti, është insistimi i vazhdueshëm nga Amerika.

Për vrasjen e vëllezërve Bytyqi gjithnjë është përmendur një emër si fajtori kryesor.

Fjala është për Goran Radosavleviq, i njohur si “Guri”, i cili është i dyshuar edhe për disa krime të tjera të kryera në Kosovë.

Por, kjo nuk e ka penguar atë që të jetë pjesë e partisë së presidentit serb, Aleksandar Vuçiq