Në Aeroportin Ndërkombëtar ‘Adem Jashari’ është pritur ekipi kosovar i xhudos nga Lojërat Evropiane, Minsk 2019.

Një numër i madh qytetarësh e gazetarësh ishin të pranishëm për t’i uruar mirëseardhje Driton Kukës, Majlinda Kelmendit e Nora Gjakovës, shkruan portali arbresh.info.

Në një prononcim për media Majlinda Kelmendi e cila është kthyer me medalje të artë nga Bjellorusia ka thënë se gradualisht po kthehet në formën që ka qenë.

“Sigurisht që po ndjehem shumë mirë, ka qenë hera e parë që po marr pjesë në Lojërat Evropiane dhe ndoshta kjo ka qenë ajo medalja që më ka mungu. Më gëzon fakti që jam bërë e para pasi që ka kohë që nuk kam marrë pjesë në një kampionat dhe kjo e rrit atë besimin që jom gati me vazhdu karrierën qaty ku e kom lon”, deklaroi Kelmendi.

“Pothuajse që 14 muaj kam qenë jashtë garave dhe ka qenë e vështirë ana psiqike, mirëpo fatmirësisht jam kthy shumë mirë. Në secilën garë që jom kthy pas lëndimit kom marr medalje e tani edhe në Lojëra Evropiane arrita të bëhem e para. Mundem me thonë që gradualisht po kthehem në formën që kam qenë”, përfundoi kampionia kosovare.

Me këtë medalje Majlinda Kelmendi është kampione e katërfishtë në Evropiane./Arbresh.info/