VV-ja dhe LDK-ja kërkojnë seancë të jashtëzakonshme lidhur me dëbimin e shtetasve turq

15:26 | 21 Qershor 2019
Arbresh Info

Lëvizja Vetëvendosje dhe Lidhja Demokratike e Kosovës, kanë dorëzuar kërkesën për seancë të jashtëzakonshme lidhur me raportin e Komisionit hetimor parlamentar për 6 shtetasit turq.

Sot deputeti i Lëvizjes Vetëvendosje, Xhelal Sveçla, njëherësh kryetar i Komisionit hetimor parlamentar dhe Driton Selmanaj, deputet i Lidhjes Demokratike të Kosovës, nënkryetar i këtij komisioni dorëzuan kërkesën për mbajtjen e seancës së jashtëzakonshme parlamentare për të shqyrtuar e votuar raportin me gjetjet e Komisionit.

Kjo seancë është kërkuar të mbahet të hënën më 24 qershor, në orën 11:00.

“31 shkeljet e gjetura nga ky komision hetimor dhe Raporti i plotë janë miratuar nga vetë Komisioni hetimor, por për shkak të zvarritjes nga Kryesia e Kuvendi ende nuk kanë dalë në rend të ditës në seancë të rregullt. Në këto kushte deputetët iniciues dhe deputetët nënshkrues dorëzuan sot kërkesën zyrtare për seancë të jashtëzakonshme”, thuhet në njoftim.