Kryetari i Vushtrrisë takohet me komandantin e KFOR-it, bisedojnë për zhvillimet në qytet

13:18 | 21 Qershor 2019
A Z

Komandanti i KFOR-it, gjeneral major Lorenzo D’Addario, ka takuar sot në Vushtrri kryetarin e Komunës, Xhafer Tahiri dhe nënkryetarin Besim Muzaqi, me të cilët kanë biseduar për zhvillimet në Vushtrri e më gjerë.

Gjenerali D’Addario, ka thënë se është shumë e rëndësishme angazhimi i institucioneve dhe liderëve për zhvillimin e vendit, që të krijohet perspektivë për të rinjtë.

“Është shumë me rëndësi që të shikojmë kah e ardhmja për ndërtimin e paqes, dhe të hapet perspektivë për gjeneratën e re të Kosovës”, ka thënë komandanti i Forcave paqësore të KFOR-it në Kosovë, gjeneral major Lorenzo D’Addario.

Nga ana tjetër Tahiri e ka njoftuar komandantin e KFOR-it për raportet e Komunës me njësitë e KFOR-it në Vushtrri.

Tahiri po ashtu ka falënderuar NATO-n dhe KFOR-in për gjithçka çfarë kanë bërë për lirinë e Kosovës, por më pas edhe për ndërtimin e paqes në Vushtrri dhe gjithë Kosovën në këto 20 vite.