Pas anulimit të datës së zgjedhjeve, në disa bashki në vend janë shtuar tensionet në qendrat e KZAZ-ve.

Pas ditëve plot tension dhe përplasjes së vazhdueshme të policisë me përfaqësues të opozitës dhe mbështetës të saj, ka reaguar presidenti Ilir Meta.

DEKLARATË E PRESIDENTIT TË REPUBLIKËS  ILIR META

U bënë dhjetë ditë që është në fuqi dekreti i Presidentit të Republikës për anulimin e datës së zgjedhjeve më datë 30 qershor, me qëllim qetësimin e situatës dhe krijimin e mundësive për dialog, që do të normalizonte situatën politike dhe do të krijonte mundësinë për një datë të re të zgjedhjeve vendore, gjithëpërfshirëse dhe demokratike.

Theksoj sërish se nuk është kurrsesi momenti për prova force, për retorikë përçarëse dhe provokuese, por për maturi dhe përgjegjshmëri të lartë për interesat kombëtare të vendit dhe vazhdimësinë e integrimit evropian që është objektiv kombëtar i të gjithë shqiptarëve.

Sërish insistoj me forcë rëndësinë e dialogut mes palëve e njëkohësisht gatishmërinë time për të kontribuar për një zgjidhje sa më të shpejtë.