Në shtëpinë, e cila në kohë lufte gjatë viteve 1998-99 ishte vënë në shërbim të UÇK-së, në përvjetorin e 17 të kujtimit të epopesë së lavdishme dhe nderimit të të rënëve për liri, në Jezerc është zbuluar një pllakë përkujtimore.

Pronari i shtëpisë, Shaip Guta, njëherësh baba i dëshmorit Lulzim Guta, ka thënë se ndjehet krenar që shtëpia e tij gjatë kohës së luftës ishte bërë strehë e luftëtarëve të lirisë.

Në ceremoninë e zbulimit të kësaj pllake morën pjesë edhe kryetari i Ferizajt, Muharrem Svarqa, deputetë të Parlamentit të Republikës së Kosovës, këshilltarë të Kuvendit të Komunës, veteranë e familjarë të dëshmorëve si dhe mysafirë të shumtë.

Në zbulimin e pllakës foli kryetari i Shoqatës së Familjeve të Dëshmorëve, Gafurr Bytyqi i cili theksoi se kjo pllakë është një nderim për të gjithë të rënët që ranë në luftën e fundit në Kosovë.

Ndërsa kryetari i Ferizajt Svarqa tha se është obligim i secilit pushtet që të nderon veprën e lavdishme të Ushtrisë Çlirimtare të Kosovës.

Deputeti i Parlamentit të Republikës së Kosovës, Elmi Reçica tha se nuk do të ishte kjo ditë dhe kjo liri, po të mos ishte Ushtria Çlirimtare e Kosovës, e mbështetur nga gjithë populli i Kosovës dhe të mos ishin dëshmorët e saj.

“Ne sot njihemi mirë, që jemi sot këtu, por në anën tjetër, patjetër që rikujtojmë atë kohë shumë të lavdishme, shumë krenare e njëkohësisht edhe shumë goditëse për ne që kemi mbetur këtu që të flasim e të zbulojmë pllaka të tilla dhe njëkohësisht të angazhohemi dhe të punojmë për të mirën e këtij vendit”, tha Reçica.