Abdullah Morsi, djali i Mohamed Morsit presidentit të parë dhe të vetëm i zgjedhur në mënyrë demokratike i cili ndërroi jetë në sallën e gjyqit në Egjipt tha se autoritetet egjiptiane nuk lejuan zhvillimin e ceremonisë për pritjen e ngushëllimeve për babain e tij, transmeton Anadolu Agency (AA).

Në një deklaratë në llogarinë e rrjetit social, Abdullah Morsi tha se autoritetet egjiptiane kanë penguar që të zhvillohet një ceremoni për pritjen e ngushëllimeve dhe një funeral të denjë për babain e tij i cili është presidenti i parë i zgjedhur në historinë e vendit.

“Madje, nuk na kanë lejuar që edhe në shtëpinë e babait tonë të zhvillojmë një ceremoni për pritjen e ngushëllimeve”, thekson më tej Abdullah Morsi.

Krahas kësaj pasi ka shprehur kënaqësinë që pavarësisht kufizimeve në Egjipt në shumë vende të botës janë falur namazet e xhenazes në mungesë për babain e tij, Abdullah Morsi tha: “O babai im, çfarë ka patur mes jush dhe Allahut, që miliona myslimanë në botë falën namazin e xhenazes për ty?.

Ndërkohë që nga autoritetet egjiptiane nuk është bërë ndonjë deklaratë në lidhje me çështjen.

– Ndërroi jetë në sallën e gjyqit

Ish-presidenti 67 vjeçar Morsi i cili u rrëzua nga pushteti me një grusht shteti ushtarak ndërroi jetë me 17 qershor në sallën e gjyqit ku ai po gjykohej me akuzat për “spiunazh” në emër të Hamasit dhe arratisje nga burgu Vadi en-Natrun”.

Morsi u zgjodh president i parë në historinë e vendit me zgjedhje në rrugë demokratike në vitin 2012 pas një revolucioni popullor në vitin 2011, që e detyroi ish-presidentin Hosni Mubarak të japë dorëheqjen.

Më 3 korrik të vitit 2013 ai u rrëzua nga detyra përmes një puçi ushtarak nga ministri i atëhershëm i Mbrojtjes dhe më pas president i Egjiptit, Abdel Fattah el-Sisi.

Në televizionin shtetëror të Egjiptit u pretendua se “Mohammed Morsi kishte një tumor beninj dhe ishte nën mbikëqyrje të vazhdueshme mjekësore ndërsa vdekja u shkaktua nga një sulm në zemër” pasi humbi vetëdijen në sallën e gjyqit.

Presidenti i parë i Egjiptit i zgjedhur në rrugë demokratike, Mohamed Morsi është varrosur nën masa intensive sigurie në Kajro në orën 05.00 sipas kohës lokale. Varrimi i Morsit është zhvilluar vetëm me pjesëmarrjen e familjes dhe avokatëve. Ai u varros në varrezat në lindje të Kajros, ku varrosen pasuesit e Vëllazërisë Myslimane (Ihvan) në lagjen Medinet Nasr.