Dhuna në familjet kosovare sa vjen e shtohet çdo ditë. Nëse llogaritet nga viti 2010 e deri në vitin 2014, sipas të dhënave të Policisë së Kosovës vërehet se numri i rasteve të dhunës të raportuara në këtë institucion është rritur dukshëm. Ato që më së shumti e pësojnë nga dhuna në familje janë femrat.

Vetëm në tre muajt e parë të këtij viti në Policinë e Kosovës janë raportuar mbi 200 raste të dhunës në familje.
“Në tremujorin e parë(janar – mars 2015) janë evidentuar 216 raste, me 180 viktima femra”, bën të ditur zëdhënësi i Policisë së Kosovës Daut Hoxha për arbresh.info.

Në vitin 2010 janë raportuar 944 raste me 764 viktima femra, në vitin 2011 numri i raportimeve është rritur në 1046 , e bashkë me të edhe numri i femrave që kanë ra pre e dhunës në familje, i cili kishte arritur në 804 viktima.

Numri i rasteve, por edhe i viktimave të dhunës nga vitit në vit sa vinte e rritej. Në vitin 2012 në organet e hetuesisë janë raportuar 1026 raste me 826 viktima femra, në vitin 2013 kjo shifër shtohet në 1087 raste dhe 869 viktima, ndërsa një vit më parë në vitin 2014 numri i viktima kishte arritur në 930, dhe të gjitha femra.

Por, zyrtarët policorë rritjen e numrit të rasteve të dhunës e shohin si rritje të numrit të raportimeve, fal rezultatit të vetëdijesimit të qytetarëve për parandalimin e dhunës.

“Nga kjo shifër e raportuar dhe shikuar trendin e rritjes nga viti 2010 deri 2014, shihet se ka ngritje të raportimit të rasteve të dhunës në familje, pra kjo rritje i referohet rritjes së numrit të raportimeve apo lajmërimit të rasteve si rezultat i sensibilizimit apo vetëdijesimit dhe jo rritjes së rasteve të dhunës në familje si tërësi”, është shprehur zëdhënësi i policisë Daut Hoxha.

Personeli i Policisë, sipas Hoxhës përgjigjet në të gjitha rasteve të Dhunës Familjare të raportuara duke ju dhënë prioritet këtyre rasteve duke ju ofruar ndihma dhe përkrahjen e nevojshme viktimave të Dhunës Familjare, për të cilën gjë bashkëpunon ngushtë me disa subjekte si Njësia për Mbrojtje dhe Përkrahje të Viktimave – Departamenti i Drejtësisë, Qendrat për Punë Sociale (QPS), Qendrat Mjekësore, Shoqata të ndryshme jo qeveritare që ofrojnë strehim etj.

/G. Lushi/ arbresh.info/