Matthijs de Ligt beson se ai dhe shokët e tij nuk duhet ta vuajnë presionin e të qenit favorit për titullin në kampionatin vendës dhe në gjysmëfinalen e Ligës së Kampionëve.

Ajax mundi Tottenhamin 1-0 në ndeshjen e parë gjysmëfinale, të martën, falë golit të Donny van de Beek.

Para ndeshjes së kthimit, Ajax, që kryeson “Eredivisie” me diferencë golash, mund të arrijë medaljen e parë të argjendtë në këtë sezon, kur të përballet me Willem II, në finalen e “KNVB Beker”, të dielën.

Gjigantët e Amsterdamit janë favoritët e mëdhenj për të fituar trofeun e 19-të të tyre. Duke qenë në “pole position” në kampionatin holandez (Eredivisie) dhe thuajse të kualifikuar në finalen e Champions-it, De Ligt pranoi se tani janë shtuar pritshmëritë ndaj skuadrës së tij.

Megjithatë, 19-vjeçari mendon se presioni i shtuar do t’i japë Ajaxit edhe më shumë përqendrim: “Sipas disave, ne nuk mund të jemi më të dobët ndaj Tottenhamit, se sa ndaj Real Madridit dhe Juventusit. Duke eliminuar këto dy skuadra të mëdha, vetvetiu e ndjen presionin për të fituar edhe në vazhdim. Roli i favoritit ta shton presionin, unë mund ta ndiej këtë. Sidoqoftë, jam tepër i fokusuar. Ne ende po luajmë për tre trofe, të gjithë ecim me angazhim të plotë përpara”, ka deklaruar De Ligt.