Agjentja ruse Maria Butina është dënuar me 18 muaj heqje lirie për përpjekjet për të infiltruar qarqet konservatore për të avancuar interesat ruse, raporton Anadolu Agency (AA).

Shtetasja ruse, 30-vjeçarja Butina, u arrestua nga Byroja Federale e Hetimeve (FBI) në muajin korrik dhe është mbajtur në paraburgim federal.

Në dhjetor, Butina deklaroi se ishte një agjente sekrete që punonte për të avancuar interesat e Kremlinit dhe ballafaqohej me dënim me burg deri në 5 vjet. Megjithatë, gjykatësja e Gjykatës amerikane, Tanya Chutkan, dha një dënim relativisht të lehtë.

Butina, një mbrojtëse e të drejtave të armëve dhe studente e diplomuar në Universitetin Amerikan, u pendua për krimin e saj dhe kërkoi shpirtbutësi gjatë seancës së sotme të dënimit.

Raportohet se koha që kaloi në paraburgim do t’i kompensohet, duke i mbetur edhe rreth 9 muaj që të vuaj dënimin prej 18 muajsh, ndërsa më pas do të dëbohet në Rusi.

Butina pranoi se që nga fillimi i vitit 2015 deri në muajin shkurt 2017 ka punuar për të mbledhur informacione për Alexander Torshin, një zyrtar rus dhe ish-ligjvënës, mbi Shoqatën Kombëtare të Pushkave dhe grupe tjera konservatore.

Ajo po ashtu pranoi se synonte krijimin e komunikimeve jozyrtare midis Torshin dhe qarqeve konservatore, që të njëjtat t’i përdor në dobi të Rusisë.