Mbyllja e qeverisë amerikane, paraqitet padia e tretë gjyqësore

20:17 | 11 Janar 2019
Arbresh Info

Një sindikatë që përfaqëson mijëra punonjës të sistemit të kontrollit ajror në Shtetet e Bashkuara ka paditur sot në gjykatë qeverinë federale.

Padia thotë se pamundësia për të paguar punonjësit gjatë mbylljes së tejzgjatur të qeverisë amerikane, mund të rrezikojë sigurinë e pasagjerëve.

Në padinë e paraqitur në një gjykatë federale në Uashington D.C., Shoqata e Kontrollit të Trafikut Ajror shprehet se mohimi i rrogës së punonjësve është shkelje e të drejtave të tyre kushtetuese.

“Amerika i do kontrollorët e trafikut ajror të fokusuar në uljen e sigurtë të aeroplanëve dhe në monitorimin e rrugëve ajrore të Amerikës, dhe jo të shpërqëndruar nga çështje financiare dhe nga ankthi i pasigurisë financiare”, shkruhet në padi.

Deri më tani, janë njoftuar të paktën tre padi gjyqësore të paraqitura nga sindikata që përfaqësojnë punonjësit federalë të qeverisë amerikane.