Procesi i integrimit të mbrojtjes civile në institucionet e Republikës së Kosovës është duke shkuar drejt fundit. Tashmë 105 ish-pjesëtar të mbrojtjes civile kanë filluar punën në ministri të ndryshme dhe agjenci të pavarura. Derisa, pjesa tjetër që do të integrohen janë në proces të intervistimit.

Mirëpo, në anën tjetër shoqëria civile po shpreh skepticizmin nëse do të ketë një integrim të mirëfilltë të pjesëtarëve të mbrojtjes civile në institucionet e Kosovës, nëse nuk përfshihet edhe verifikimi i sigurisë për të gjithë këta pjesëtar.

Ministrja pa Portofol në Qeverinë e Kosovës Edita Tahiri thotë se marrëveshja për shuarjen e të ashtuquajturës mbrojtje civile ka hyrë në fazë finale, ku janë dy procese paralele që po zhvillohen.

“E para procesi i marrjes së objekteve në këtë fazë, ndërsa më herët janë shuar të gjitha ato mekanizmat që kanë pasur, si pikat vëzhguese e tjera dhe procesi i dytë paralel është rekrutimi i këtyre pjesëtarëve në institucionet e Kosovës në bazë të marrëveshjes dhe në bazë të vendimit që kemi marrë në Qeverinë e Kosovës. Një prej punëve është pranim dorëzimi i objekteve ku ata kanë vepruar më përpara….Ajo që është kryesorja në këtë proces është se rekrutimi mund të them se është 80 për qind të intervistave janë kryer, ka mbetur edhe një pjesë, paneli vazhdon deri në përfundim”, tha Tahiri.

Deri më tani punën në institucionet e Kosovës kanë filluar 105 ish-pjesëtar të mbrojtjes civile, derisa pjesa tjetër pritet të nis punën deri në fund të shtatorit. Ministrja Tahiri thotë se janë 483 ish-pjesëtar të kësaj organizate që do të integrohen, ku 50 do të jenë në pritje, pasi nuk kanë kapacitete për të gjithë. Ajo shton se kryesore është që të revitalizohen objektet ku do të vendosen ish-pjesëtarët e mbrojtjes civile.

“Në fakt numri që ne do t’i integrojm? ? është 483, prej tyre 50 prej tyre do të jenë në pritje për shkak të mungesës së kapaciteteve tona për t’i integruar të gjithë, ndërsa 433 do të integrohen. Deri më tani 105 kanë nënshkruar kontratat, të tjerët janë intervistuar, së shpejti nënshkruhen kontratat. Por për të kryer procesin ne duhet të kryejmë revitalaizimin apo renovimin e objekteve dhe krijimin e kapaciteteve sepse kemi pasur pak vonesa, ka pasur vonesa edhe nga ana e palës tjetër e cila vononte dorëzimin e këtyre pikave vëzhguese, në veçanti pikën vëzhguese në urën e Ibrit”, tha ajo.

Tani Policia e Kosovës e ka marr pikën vëzhguese apo kontejnerin mbi lumin Ibër e cila do të përdorët për nevojat e Policisë, derisa të tjerat janë mbyllë më herët.

Ndërsa, Ministria e Administrimit të Pushtetit Lokal tashmë ka identifikuar objektet në të cilat do të vendosen ish-pjesëtarët e mbrojtjes civile që do të integrohen në institucione t e Kosovës. Mirëpo, për rinovimin e tyre përgjegjëse është Ministria e Administratës Publike.

Sekretari i Përgjithshëm i Ministrisë së Administrimit të Pushtetit Lokal, Besnik Osmani përmes një përgjigje elektronike i ka thënë KosovaPress-it se procesi i integrimit të këtyre pjesëtarëve në institucionet e Kosovës po vazhdon edhe me tutje.

Mirëpo, shoqëria civile po shpreh skepticizëm nëse pjesëtarët e mbrojtjes civile do të integrohen mirëfilli nëse nuk përfshihet edhe procesi i verifikimit të sigurisë.

Sekretari i Qendrës Kosovare për Studime të Sigurisë, Mentor Vrajolli tha për KosovaPress se procesi i integrimit të tyre është stërzgjatur, për çka stërzgjatja e këtij procesi tashmë dihet, pasi ka qenë një numër mjaftë i madh që iu ka nënshtruar një procesi dhe për Qeverinë e Kosovës ka qenë një barrë mjaftë e madhe që të mund të realizojë.

Qeveria e Kosovës tashmë ka listën e institucioneve që do të nisin punën ish-pjesëtarët e mbrojtjes civile. Shumica e ministrive do të kenë zyra lokale, inspektorate të ndryshme apo mekanizma të tjera ashtu siç i kanë në komunat tjera. Ndërsa, duke filluar nga Agjencioni i Statistikave të Kosovës, deri te Agjencioni Kadastral, ai i Ushqimit, do jenë vende pune për ish pjesëtarët e mbrojtjes civile. Megjithatë, shumica prej tyre kanë kërkuar që të punësohen në institucionet e sigurisë, si në Policinë e Kosovës.