Viti 2018 do të mbahet mend si viti i Luka Modric.

Mesfushori kroat i Real Madrid, ka arritur të fitojë Topin e Artë, për t’i dhënë fund dominimit dhjetë vjeçar të Lionel Messit dhe Cristiano Ronaldos.

33 vjeçari, ka marrë votat e pjesës më të madhe të gazetarëve votues nga 181 vende, për të fituar trofeun më të madh individual në karrierë.

Pas këtij çmimi, Modric derisa po fliste për emocionet e përjetuara për France Football, ka zbuluar se kur ka filluar të mendojë se mund ta arrijë këtë sukses, përcjell lajmi.net.

Modric ka thënë se ishte ish trajneri i Real Madrid, Zinedine Zidane, ndër të parët që i kishte thënë se mund ta fitonte Topin e Artë. E gjitha kjo ka ndodhur në vitin 2016.

“Kur Zinedine Zidane arriti në Real si trajner (janar 2016), ai një ditë më thirri në zyrën e tij pas stërvitjeve”, deklaron Modric.

“Ai më shpjegoi se si më perceptoi mua si një lojtar, e po ashtu më tregoi se çfarë priste nga unë. Ai më tha se unë do të jem një lojtar shumë i rëndësishëm për të. Ai gjithashtu më pa si një lojtar i cili në të ardhmen mund të fitojë Topin e Artë”, ka shtuar Modric.

“Kur dikush si Zidane, me personalitetin dhe përvojën që ka e thotë këtë, atëherë kjo gjë ju rrit në aspektin e besimit”.