Një 30-vjeçar është gjobitur me 300 euro dhe burgosur për tre muaj pasi kishte fyer me fjalë të renda një vajzë të re në autobus. Ky është dënimi i parë i vendosur në Francë sipas një ligji të ri në këtë vend që synon të luftojë fenomenin e ngacmimeve seksuale në publik.

Incidenti ndodhi të mërkurën e kaluar, kur 30-vjecari, dukshëm i dehur, kishte hipur në autobus duke fiksuar një 21-vjeçare. Më pas ai e kishte goditur në fytyrë, duke e quajtur të përdalë dhe duke komentuar masën e gjoksit të saj.

Vajza arriti të paralajmërojë shoferin, i cili mbylli dyert e autobusit derisa arriti policia, duke bërë të mundur arrestimin e autorit.

Ky nuk është rasti i parë që ndodh në Francë. Para disa muajsh kjo video, ku një burrë godet dhe fyen në mes të ditës në një nga sheshet e Parisit këtë grua u bë virale ne internet.

Ligji i ri gjithashtu gjobit çdo individ i cili komenton në mënyrë vulgare pamjen apo veshjen e një gruaje, vëzhgon në mënyrë jo të zakontë, bën pyetje të bezdisshme, ndjek një femër pa pëlqimin e saj apo e fotografon fshehurazi.